Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Hnub no, txhua txhia tus nyob thoob plaws qhov txhua chaw hauv qab ntuj no sawv daws tuaj ua kev zoo siab nco txog koob tsheej Tswv Yexus yug. Ntawm no yog lub caij peb ua Vajtswv tsaug Vajtswv tau pub tus Cawm Seej rau ntiajteb. Tswv Yexus yog qhov kaj rau lub ntiajteb no yog tus Tswv ntawm txoj kev kaj siab, yog tus Cawm Seej, thiab qhov khoom plig loj tshaj plaws thiab yog tus neeg tseem ceeb nyob rau lub koob tsheej xyoo no.
Hnub no, yog hnub 24/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm LUB HWJCHIM CAWM DIM
“Tus Tswv uas yog nej tus Vajtswv yeej nrog nraim nej nyob; nws lub hwjchim ua rau nej kovyeej lawm! Tus Tswv yuav txaus siab kawg rau nej vim nws txojkev hlub, nws yuav pub nej muaj lub neej tshiab. Nws yuav hu nkauj thiab zoo siab heev rau nej”. (Xefaniyas 3:17)
Txhua xyoo, thaum lub caij koob tsheej los txog ces txhua tus nyob hauv ntiajteb no puav leej ua koob tsheej nco txog Tswv Yexus los yug dhau ntawm tej teeb cig lam lug nrog txoj kev cia siab nyob hauv lub siab. Tej yam uas xav tsis thoob nyob hauv lub koob tsheej, txoj kev zoo nkauj ntawm tej teeb cig tuaj thiab qhov khoom plig ua koob tsheej thiab tej yam uas nco ntsoov cia yog qhov khoom plig muaj nqis tshaj uas Vajtswv muab pub rau tib neeg ntiajteb yog Tswv Yexus. Tswv Yexus yog tus coj txoj kev cia siab los pub rau peb thaum los yug ua neeg zoo li ib tug menyuam mos, nyob hauv lub ntiajteb no tuag saum Ntoo Khaub Lig theej tib neeg ntiajteb lub txhoj. Vajluskub tseem qhia rau peb paub tias Nws yog qhov kaj rau lub ntiajteb, yog tus Tswv ntawm txoj kev kaj siab, yog tus Cawm Seej thiab cawm peb dim (Yaxayas 9:5 thiab 44:6, Yauhas 3:16 thiab 8:12, Tes Haujlwm 4:12).
Vim tib neeg tus yawg koob yog Adas thiab Evas nkawd tsis mloog Vajtswv lus tiamsis ho mloog yeebncuab lus, uas yog dab ntxwgnyoog, yog li kev txhaum thiaj los rau hauv ntiajteb no. Qhov no ua rau peb nco txog txoj kev sib raug zoo ua ke ntawm tib neeg thiab Vajtswv, tus uas tsim lub ntiajteb no, raug puas tsuaj yog li neeg ntiajteb thiaj tsau tsawv rau hauv txoj kev txhaum (Chivkeeb 3:2-6). Vajluskub qhia rau peb paub tias yav dhau los tamsim no thiab mus ib txhis tsis muaj hnub hloov pauv txawm yog txhua yam hloov pauv tas. Vim tib neeg ua txhaum yog li lawv ua poob txoj kev sib raug zoo ua ke nrog Vajtswv lawv thiaj yuav raug ris txoj kev txiav txim mus ib txhis (Chivkeeb 3:7 thiab 3:22-24).
Vim ua txhaum yog li txoj kev sib raug zoo ua ke ntawm tib neeg thiab Vajtswv thiaj raug puas tsuaj. Txawm yog lawv yuav siv zog ua raws li txhua nqe kevcai tau sau nyob hauv Vajluskub Qub los yeej khiav tsis dim txoj kev teem txim mus ib txhis rau txoj kev txhaum yog kev tuag. Tiamsis Vajtswv muaj homphiaj yuav cawm tag nrho tib neeg ntiajteb los ntawm txoj kev pub Tswv Yexus los rau hauv lub ntiajteb no kom theej txhoj rau lawv. Tseeb tiag, muaj ntau nqe Vajluskub hais txog tus Mexiyas yuav los thiab yog tus yuav cawm tag nrho tib neeg ntiajteb tau sau nyob hauv Teev Npe 24:17-19, Yaxayas 9:5 thiab 42:1-4, Xefaniyas 3:17). Nyob rau ntawm kuv, nqe Vajluskub nyob hauv Xefaniyas 3:17 coj txoj kev cia siab los rau kuv lub sijhawm uas muaj kev txomnyem:
“Tus Tswv uas yog nej tus Vajtswv yeej nrog nraim nej nyob; nws lub hwjchim ua rau nej kovyeej lawm! Tus Tswv yuav txaus siab kawg rau nej vim nws txojkev hlub, nws yuav pub nej muaj lub neej tshiab. Nws yuav hu nkauj thiab zoo siab heev rau nej”.
Nqe Vajluskub hais txog tus Mexiyas yuav los thiab nws yuav xaus txoj kev txiav txim tseg rau haiv neeg Yixalayees. Tswv Yexus yog Vajtswv los rau hauv tib neeg ntiajteb no. Tswv Yexus tau ua neej nyob, tau noj thiab nrog cov thwjtim nyob ua ke qhia lawv txoj kev ua neej nyob hauv lub ntiajteb no. Los ntawm Tswv Yexus txoj kev tuag saum Ntoo Khaub Lig tib neeg ntiajteb thiaj rov qab muaj txoj kev sib raug zoo ua ke nrog Vajtswv dua.
Yog ib qhov zoo uas Vajtswv pub rau peb thaum uas Vajtswv tshwm los nyob ntawm peb, nrog peb mus ua ke txhua hnub thiab xav kom peb muaj txoj kev sib raug zoo ua ke nrog Vajtswv ib yam li Vajtswv tau muaj nrog Adas thiab Evas nkawd ua ntej uas nkawd poob kev txhaum. Dhau ntawd, Vajtswv tseem yuav nrog nraim peb, hlub peb los ntawm txoj kev hlub ib txhis zoo li tus nraug vauv hlub nws tus nkauj nyab.
Thov caw nrog kuv peb thov Vajtswv ua ke
Ua Vajtswv tsaug vim kuv txais tau qhov khoom plig zoo kawg nkaus uas tsis muaj nqi yog Tswv Yexus ua tus tswv hauv kuv lub neej. Kuv ua Vajtswv tsaug vim Vajtswv tau hlub thiab tiv thaiv kuv los ntawm txoj kev hlub ib txhis thiab zoo kawg nkaus. Thov Vajtswv koj nrog nraim kuv mus thiab pab kom kuv nyob ze koj txhua lub caijnyoog thaum muaj kev kaj siab ib yam li thaum ntsib kev sim siab. Ua Vajtswv tsaug vim Koj yog kuv txoj kev cia siab mus ib txhis. Kuv thov hauv Tswv Yexus Khetos lub npe. Amees.
Cov kwv tij txhua tus, thaum uas peb ntseeg Vajtswv ces Vajtswv txoj kev hlub yuav rhuav tshem txoj kev txhawj ntshai tamsim thiab kev txhawj xeeb txog peb lub neej tom ntej. Cia siab tias koj kuj yuav saj tau lub sijhawm ntawd thaum uas koj txais tau qhov khoom plig zoo kawg nkaus uas yog Tswv Yexus pub rau tib neeg ntiajteb. Txhob hnov qab qhia qhov khoom plig no pub rau tej neeg txheeb ze thiab txhawb kom lawv qhib siab los txais yuav Vajtswv nyob rau hauv lub koob tsheej xyoo no.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply