Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Puas tau muaj zaum twg koj hnov qaug zog vim tos Vajtswv teb koj tej lus taij thov? Muaj qee lo lus taij thov tau muab qhia rau Vajtswv ntev los lawm tiamsis tsis hnov Vajtswv teb. Vajtswv txojlus hnub no txhawb kom koj tso siab rau Vajtswv thiab tos Vajtswv lub sijhawm.
Hnub no, yog hnub 27/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Markins dhau ntawm Zaj kawm TOS VAJTSWV LUB SIJHAWM
“ Tus Tswv koj yuav ua txhua yam raws li koj tau cog lus tseg lawm, tus Tswv, koj txoj kev hlub nyob mus ibtxhis. Thov koj tsis txhob tso tej haujlwm uas koj pib ntawd tseg.” ( Ntawv nkauj 138:8)
Peb yeej muaj ntau zaug nyob hauv txoj kev tos ib yam dabtsi lawm, tos tej haujlwm me mus txog rau tej haujlwm loj, piv txwv li peb nres tos them nyiaj rau tej khoom peb yuav, tos yuav roj tsheb. Lossis tos tus neeg peb hlub, tos cuaj lub hli tus menyuam thiaj tau yug los, lossis tos ua tus loj saib xyuas txoj haujlwm lossis tos kom tau nce nyiaj hli. Yog li tos yog ib yam uas ib txwm tshwm sim nyob rau hauv lub neej no.
Tiamsis puas tau muaj zaum twg koj ntsia rau ib qhov teeb meem twg hauv lub neej thiab cim civ nug tias puas tsismnyog rau peb tos li ntawd? Puas tau muaj zaum twg koj tos kom muaj sijhawm hloov pauv, hloov mus rau lwm txojkev nyob hauv ib lub sijhawm ntev, lossis thooj yim muab tso tseg vim tsis muaj dabtsi yuav hloov tau lub caijnyoog?
Kuv kuj tau tos ib lub sijhawm ntev heev kom tau ua raws li yam uas kuv nyiam nyob hauv lub neej, tshuav koj ne zoo li cas, qhov twg thiaj yog yam uas koj yooj yim muab tso tseg thaum uas yuav tsum tos ib yam dabtsi? Tej zaug peb ib leeg nyias puav leej muaj nyias lo lus teb rau tus kheej. Ntawm kuv tus kheej lub sijhawm tu tej menyuam, thiab tuav lub neej txijnkawm kom muaj kev sib hlub nrog rau ua lag luam yog rau kuv lub homphiaj hauv kuv lub neej. Ntawm no yog tej yam uas nws yog kev tiamsis hais tseeb tiag nws yeej yooj yim xav muab tso tseg vim ntshai thiab tsis muaj tus pab tawm tswv yim. Tiamsis thaum uas kuv muab txhua yam no fij rau Vajtswv ces Vajtswv txhawb kuv zog thiab nplig kuv siab kom kuv nrog nws mus ua ke.
Vajtswv txojlus nyob hauv Yaxayas 40:31 coj txoj kev txhawb zog los rau kuv thaum ua neej nyob hauv lub ntiajteb: “ tiamsis cov neeg uas cia siab ntsoov rau tus Tswv yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.
Puas tau muaj zaum twg koj siv zog daws tej teeb meem los ntawm koj tus kheej lub zog uas tsis vam khom Vajtswv lawm los tsis tau? Qhov uas peb ua raws li peb lub siab nyiam yuav ua rau peb txais tau tej yam tsis zoo thiab txais tau kev puas tsuaj.
Yog li muaj ntau zaug nyob hauv lub neej kuv thiaj tau nug sawv daws txog tej kev tsis ncaj ncees thiab yam uas ua tsis yog kom nrhiav tau lub hauv paus tias vim li cas lawv ho ua li ntawd kom sawv daws nrhiav kev pab daws tej teeb meem ntawd. Yog li, thaum kuv rov qab tshuaj kuv tus kheej, kuv yuav tau siv zog tswj kom txhob ua yuam kev yam tsis raws li siab xav. Tiamsis peb yuav tau siv kev txawj ntse thiab ua tib zoo nyob hauv txhua tes haujlwm uas peb ua.
Kom daws tau qhov teeb meem ntawd, peb yuav tau ua tib zoo xav ua ntej peb yuav ua, peb yuav tau thov Vajtswv, nyeem Vajtswv txojlus kom peb nrhiav tau kev txawj ntse los ntawm Vajtswv los. yog tias koj tab tom ntsib teeb meem ces koj yuav tau thov Vajtswv meej meej raws li tej lus taij thov tawm tswv yim hauv qab no: “Ua Vajtswv tsaug rau tej uas koj pub rau kuv. Thov Vajtswv koj pab kuv kom kuv nrhiav koj thiab tos koj lub sijhawm pab kom kuv tiv dhau lub caij nyoog zoo li no,”
Hauv qab no yog qee yam uas peb yuav tau ua kom peb muaj kev cia siab rau Vajtswv thiab ntseeg Vajtswv lub homphiaj zoo uas Vajtswv twb npaj ua ntej rau peb lawm.
Cia li xav saib vim li cas Vajtswv ho cia koj ntsib lub caijnyoog zoo li ntawd thiab ntseeg tias Vajtswv yog tus nrog nraim koj nyob thiab yuav hloov pauv koj lub caij nyoog raws li Vajtswv lub siab nyiam.
Nrhiav ib tug phoojywg koom ib txoj kev ntseeg zoo li koj kom nws nrog koj thov Vajtswv thiab sib txhawb zog.
Nyeem Vajluskub txog tej tus qauv uas qhia txog lawv tau tos Vajtswv thiab cov ntseeg uas lawv tau muab siab tos tus Tswv. Cia li xyaum ua raws li Tswv Yexus tus qauv.
Tseeb tiag Vajtswv txojlus nyob hauv Ntawv Nkauj 138:8 coj txoj kev txhawb zog thiab nplig siab rau cov neeg uas tos Vajtswv. “ Tus Tswv koj yuav ua txhua yam raws li koj tau cog lus tseg lawm, tus Tswv, koj txoj kev hlub nyob mus ib txhis. Thov koj tsis txhob tso tej haujlwm uas koj pib ntawd tseg.”
Thov caw nrog kuv peb thov Vajtswv ua ke
Ua Vajtswv tsaug vim koj muaj homnpliaj zoo tseg rau kuv lub neej dhau los ntawm tej yam uas tab tom tshwmsim nyob hauv kuv lub neej. Thov Vajtswv coj coj kuv kev, thiab pab kom kuv muaj kev txawj ntse thiab pab kom kuv ua tib zoo xav ua ntej uas kuv yuav txiav txim siab ua ib yam dabtsi twg. Thov Vajtswv koj pab kom kuv ruaj siab rau koj thiab tos yam uas koj twb cog lus yuav muab pub rau kuv. Kuv thov hauv Tswv Yexus lub npe. Amees.
Cov kwvtij cia li nrhiav Vajtswv, thiab thov Vajtswv ntxiv zog rau koj kom koj muab siab rau ntseeg thaum txog Vajtswv lub sijhawm uas zoo. Vajtswv yuav pab kom koj nthuav tau tis ya siab zoo li tus dav thiab ua tau tej yam loj nyob hauv koj lub neej. Tseg sijhawm los nrog Vajtswv nyob ua ke. Xav txog Vajtswv Txojlus, thiab muab koj tej teeb meem qhia rau Vajtswv. Koj kuj muaj cuab kav qhia rau ib tug uas ntseeg ib yam li koj kom nws thov Vajtswv pab koj nyob rau lub sijhawm, uas koj tos Vajtswv teb koj tej lus thov.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply