Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Puas muaj zaum twg koj ntshai tias ib tsam Vajtswv rov qab hais txog koj tej kev txhaum yav dhau los? Tej kev txhaum yav dhau los puas tab tom tav koj kev tsis pub koj ua Vajtswv haujlwm? Kev hlub, kev ua siab ntev thiab Vajtswv txoj kev zoo tseg rau peb siab dhau peb txoj kev nkag siab. Vajtswv txojlus hnub no ntuas kom peb nco ntsoov tej uas Vajtswv tau zam txim rau peb thiab Vajtswv rov qab pub peb muaj feem ua Vajtswv menyuam dua.
Hnub no, yog hnub 28/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Linda Vulcalno dhau ntawm Zaj kawm TAU ZAM TXIM THIAB ROV QAB KHO ZOO
“Txojkev hlub ntawd muaj txhua hnub, ib yam li lub hnub niaj tagkis tawm tuaj.” Nkauj quaj ntsuag 3:23).
Petus tau poob kev ntseeg thaum uas nws ntsia ntsoov Tswv Yexus raug ntes. Ua ntej ntawd, yawg yeej hais khov kho tias tsis muaj hnub tso Tswv Yexus tseg txawm yog tej neeg ib ncig yuav zoo li cas. Tiamsis Tswv Yexus paub ua ntej txhua yam thiab cev lus ua ntej tias qaib qua ob zaug ces yawg yuav ntxeev siab rau Tswv Yexus peb zaug. Thaum Tswv Yexus raug tub rog cab mus ces Petus tau tsis lees paub Tswv Yexus. Peb zaug yawg hais tias yawg yeej tsis paub Tswv Yexus. Thaum qaib qua ob zaug ces yawg quaj tu siab heev.
Yog tias muaj ib qhov kev txhaum twg ua rau ib tug thwjtim tso dej num tseg ces qhov kev txhaum uas tso Yexus Khetos tseg yog qhov kev txhaum uas loj dua ntais. Lukas 22: 62 sau tias Petus tau quaj tu siab heev tomqab uas tsis lees yuav Tswv Yexus peb zaug.
Tiamsis ua Tswv Yexus tsaug vim Koj yog tus Cawm Seej, yog tus tau tuag theej kuv thiab ris peb tej kev txhaum. Txawm li los peb yeej paub txog qhov tsis zoo ntawm txoj kev txhaum. Yog li tsis paub xyov Petus puas tau kho zoo kom rov qab los ua tus neeg nrog Yexus Khetos mus ua ke? Tsis paub yawg puas tseem rov qab qhia thiab tshaj tawm rau lwm tus dhau los ntawm tej uas yawg tau ua lawm?
Tomqab Tswv Yexus sawv rov qab los ces Nws mus nrhiav Petus. Vajtswv txojlus nyob hauv Yauhas 21:15-17 qhia rau peb paub tias Tswv Yexus tau nrhiav pom Petus thiab nug yawg tias: “Ximoos Yauhas tus tub, koj hlub kuv tshaj lawv cov no los? ” Tswv Yexus nug Petus peb zaug lo lus nug. Thiab peb zaug yawg yeej hais tias hlub tus Tswv. Tomqab txhua zaug uas yawg teb tias hlub tus Tswv ces Tswv Yexus kuj hais rau yawg peb zaug tias. “cia li yug kuv pab yaj… yug kuv pab yaj. Cia li yug kuv pab yaj.”
Tomqab ntawd, Tswv Yexus hais rau Petus tias: “Cia li nrog kuv mus” Tswv Yexus xav kom yawg ua yawg qhov dej num uas Tswv Yexus tau muab cob rau yawg, Tswv Yexus tau kho yawg zoo thiab pub yawg rov qab ua thwjtim muab dejnum tshaj tawm Txojmoo Zoo thiab coj neeg los ua thwjtim cob rau yawg. Yog li Petus thiaj nkag rau hauv ntu neej tshiab thiab tej yam ua tsis tiav yav dhau los tsis cuam tshuam rau yawg ntxiv lawm.
Henplais 12:15 qhia rau peb paub tias tsuas muaj ib qhov kev puas tsuaj uas peb yuav tau ntshai xwb yog: “Ceevfaj tsis txhob pub nej cov ib tug twg tso Vajtswv txojkev hlub tseg. Tsis txhob pub nej cov ib tug twg ua neeg zoo li tsob nroj iab uas hlob tuaj ua rau ntau leej muaj kev ntxhov siab”.
Tswv Yexus tau ua rau txhua yam dhau los tshiab tuaj tom qab Tswv Yexus tuag theej peb txhua tus tej kev txhaum. Tswv Yexus yog tus uas zam txim rau peb tej kev txhaum yav dhau los thiab Tswv Yexus tau ua li ntawd rau Petus. Thaum peb lees peb tej kev txhaum ces Tswv Yexus zam peb tej kev txhaum thiab pub rau peb muaj dua ib txoj kev pib dua tshiab. Vajtswv txojlus nyob hauv Nkauj Quaj Ntsuag 3:23 qhia rau peb pom txog Vajtswv txoj kev ua siab ntev rau peb txhua hnub.
Thov caw nrog kuv peb thov Vajtswv ua ke.
Ua Tswv Yexus tsaug yog tus tau los rau hauv lub ntiajteb no ua tib neeg, tuag saum Ntoo Khaub Lig theej kuv tej kev txhaum dhau ntawd kuv thiaj dim ntawm kuv tej kev txhaum uas tsim nyog tuag. Ua Vajtswv tsaug vim Koj tsis yog cawm kuv xwb tiamsis tseem pub rau kuv muaj feem qhia Txojmoo Zoo thiab mus coj neeg los ua thwjtim. Thov Vajtswv pab kom kuv ncaj ncees rau hauv tes haujlwm uas koj muab cob rau kuv. Kuv thov hauv Tswv Yexus Khetos lub npe. Amees.
Cov kwv tij txhua tus, kev txhaum yuav phem li cas los Tswv Yexus puav leej zam txim tau, tsuav yog koj lees txim tiag thiab cia Vajtswv ua haujlwm xwb. Ntseeg siab rau Vajtswv thiab nrog Nws mus ua ke vim txhua hnub dhau mus puav leej yog lub sijhawm tshiab uas Vajtswv pub rau peb. yog li txhob cia txoj kev dag ntxias nyob rau yav dhau los tav peb tsis pub peb mus raws li Vajtswv lub suab hu. Zoo siab hlo txais yuav tes haujlwm uas Vajtswv muab cob rau koj hauv ntiajteb no.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.