Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Peb lub neej mus lawv Vajtswv qab tsis yog peb mus ib leeg rau qhov peb muaj Vajtswv ua tus nrog nraim thiab coj peb txhua txoj hau kev. Vajluskub muaj Vajtswv tej lus cog tseg loj nyob rau hauv kom peb muaj kev kaj siab tiv dhau tej kev sim siab hauv lub neej thiab saj tau lub neej puv npo nyob hauv Vajtswv.
Hnub no, yog hnub 30/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Paulette Harper dhau ntawm Zaj kawm SO LUB KUA MUAG MUS
“Yog kuv paub hais tias Vajtswv yuav muab kuv tua, txawm yog mob npaum li cas los kuv yeej zoo siab. Kuv paub hais tias Vajtswv yog tus dawbhuv; kuv tsis tau tawmtsam nws tej lus samhwm li” (Yauj 6:10)
Vajtswv txojlus nyob hauv Luv 1:20-22 sau tias: “Nej tsis txhob hu kuv ua Na-aumis lawm, nej hu kuv ua Malas xwb, rau qhov Vajtswv tus uas muaj Hwjchim loj kawg nkaus tau ua rau kuv lub neej raug kev txomnyem lwj siab kawg li. Thaum kuv tawm hauv no mus, kuv muaj txhua yam nplua mias, tiamsis tus Tswv coj kuv rov los tes dawb tes npliag. Vim li cas nej tseem hu kuv ua Na-aumis, thaum tus Tswv uas muaj Hwjchim loj kawg nkaus rau txim thiab tso kev txomnyem los rau kuv? “Zaj no yog hais txog Na-aumis thiab Luv uas yog nws tus nyab uas yog neeg Mau-am, rov nram tebchaws Mau-am los. Thaum nkawd los txog hauv lub nroog Npelehees tabtom yog lub caij uas pib hlais nplej.”
Yog tias koj tsis tau nyeem zaj xwm txheej no kuv txhawb kom koj mus nyeem kom tag nrho phau Luv vim pog Na-aumis lub neej hloov pauv ntau kawg. Ua ntej, yawm Elimelej nrog nws tus pojniam Na-aumis thiab ob tug tub tawm hauv Npelehees mus vim tab tom muaj kev tshaib nqhis loj heev tshwm tuaj rau hauv lub xeev ntawd. Vim khiav kev tshaib nqhis lawv tsev neeg thiaj tsiv mus nyob rau Mau-as. Thaum tab tom nyob rau hauv tebchaws Mau-as ces Na-aumis tus txiv tuag. Nws ob tug tub yog Maloos thiab Khili-oos nkawd yuav tau ob tug ntxhais los ua pojniam yog Luv thiab Aulepas. Kaum xyoo tom qab pog ob tug tub kuj tuag lawm tseg ob tug nyab nrog pog nyob ua ke. Thaum hnov xov tias Vajtswv hlub tshua txog cov neeg Yixalayees thiab pub zaub mov rau lawv ces pog thiab nws tus nyab hu ua Luv thiaj rov qab los rau hauv lub nroog Npelehees. Tiamsis sawv daws saib pog ces pog hais rau lawv tias txhob hu nws ua Na-aumis lawm tiamsis hu pog ua Malas vim Vajtswv ua rau pog ris ntau txoj kev iab kev daw.
Nyob ntawm kuv, kuv tsis nco zoo tias kuv twb nyeem ntu Vajluskub no tsawg zaus lawm. Tiamsis kuv paub tias Vajtswv siv ntu Vajluskub no los qhia ntau zaj kawm rau kuv. Yog li kuv thiaj ntseeg tias tag nrho Vajtswv txojlus tau sau tseg yog tseg qhia rau peb kom peb kawm tau tej zaj kawm muaj nqis nyob rau hauv lub neej no. kuv kuj xav tsis txog tias muaj ib hnub twg kuv yuav siv Vajtswv tej lus qhia los coj rau kuv lub neej.
Kuv kuj ntsib dhau lub sijhawm zoo ib yam li pog Na-aumis thaum uas kuv tiv dhau ntu neej uas muaj ntau txoj kev txomnyem thiab sim siab nyob hauv lub neej no. Txawm yog nyob hauv txoj kev nrog tus Tswv mus yeej tseem muaj ntau qhov kev nyuaj los Vajtswv siv tej lub sijhawm ntawd los pab kom kuv loj hlob sab ntsujplig. Tsis tas li ntawd, Vajtswv siv tej lub sijhawm uas tsis zoo ntawd los pab kom peb pom tias Vajtswv yog tus muaj homphiaj zoo tseg rau peb.
Xyoo no kuv muaj 42 xyoo, kuv lub neej txij nkawm sib nrauj tas. Kuv lub neej poob mus rau hauv lub qhov tob. Tiamsis Vajtswv tsis tso kuv tseg.
Ua Vajtswv tsaug Vajtswv coj kuv dhau ib kaujruam zuj zus nyob rau hauv lub neej no. Ua Vajtswv tsaug vim Vajtswv pab kom kuv ntseeg Vajtswv thiab muab kuv lub neej fij rau Nws yog tus paub zoo yam twg yog yam zoo rau kuv. Muaj ntau yam tshwm los nyob rau hauv kuv lub neej tiamsis ntseeg tias Vajtswv tej lus cog tseg nrog nraim kuv nyob thiab pab kom kuv tiv dhau tej kev txomnyem kev sim siab uas kuv tab tom ntsib nyob rau hauv lub neej no.
Ua Vajtswv tsaug vim Vajtswv muab kuv tej kev iab siab pauv los ua kev zoo siab rau kuv thaum uas Vajtswv tso cai rau tej lub caijnyoog tsis zoo tshwm sim los kom cob qhia kuv dhau los ua ib tug neeg zoo dua.
Ua Vajtswv tsaug vim Vajtswv siv tej lub caijnyoog muaj kev txomnyem ntawd los pab kom kuv ntseeg siab rau Vajtswv thiab loj hlob ntawm sab ntsujplig. Ua Vajtswv tsaug vim Vajtswv pab kuv kom kuv txhob ntsia rau lub caijnyoog tamsim tiamsis saib ntsoov rau Vajtswv thiab cia siab rau Vajtswv thiab npaj txhij kwv kuv tus ntoo khaublig nrog Nws mus.
Vajtswv thiaj yog tus muaj daim duab loj tseg rau kuv thiab Vajtswv twb nthuav tawm tej ntawd rau kuv paub rau xyoo 2007. Thaum ntawd, Vajtswv xav kom kuv qhia tej yam uas Vajtswv ua nyob hauv kuv lub neej thaum Vajtswv tso cai rau tej teeb meem sim siab tshwm los raug rau hauv kuv lub neej tshwm tuaj ib ncig ntawm kuv. Tseeb tiag, kuv sau phau ntawv muaj lub npe tias That Was Then, This is Now: This Broken Vessel Restored (txhais tias: Yav thaum ub thiab tamsim no: Lub khob uas tawg lawm rov qab tau muab lo rau) yog hais txog tej kev mob siab, tej kua muag tau poob thaum peb ntsib kev txomnyem tiamsis twb tau Vajtswv pab zog kom peb kov yeej txoj kev tu siab ntawd.
Txawm yog nyob rau hauv lub neej muaj ntau lub caijnyoog ua rau kuv tso tseg los ua Vajtswv tsaug Vajtswv yog tus ntxiv zog rau kuv kom kuv siv zog nrog tus Tswv mus. Vaj Ntsujplig yog tus txhawb zog yog tus coj kev thiab ua rau kuv ntseeg tias txhua yam uas Vajtswv tso cai tshwmsim los puav leej nyob hauv Vajtswv lub siab nyiam. Tsis tas li ntawd, Vajtswv muaj homphiaj zoo tseg rau kuv lub neej tamsim no thiab tomntej.
Thov caw nrog kuv peb thov Vajtswv ua ke
Ua Vajtswv tsaug vim Koj yog tus muaj homphiaj zoo tseg rau kuv. Txawm yog tamsim no kuv ntsib kev txomnyem los ua Vajtswv tsaug vim Koj tau siv zaj kawm hnub no los pab kom kuv nco tias Koj yog tus nyob rawv ntawm kuv ib sab thiab ua rau kom kuv muaj kev zoo siab thiab muaj kev cia siab nyob hauv lub neej no. Thov Vajtswv pab kom kuv tig los rau ntawm Vajtswv txais yuav txoj kev zoo siab rau ntawm koj. Kuv thov hauv Tswv Yexus Khetos lub npe. Amees.
Cov kwv tij txhua tus, txawm yog muaj qee yam tshwmsim tuaj tsis raws li koj lub siab xav los Vajtswv txojlus hnub no txhawb kom koj ntseeg siab rau Vajtswv yog tus muaj lub homphiaj loj thiab zoo tseg rau koj. Cia li ntseeg Nws vim Vajtswv yog tus yuav pub txoj kev kaj siab rau koj nyob hauv lub neej no. Txhob ntsia rau lub caijnyoog tamsim tiamsis saib ntsoov mus rau ntawm Vajtswv, cia siab rau Vajtswv thiab npaj txhij kwv koj tus ntoo khaublig nrog Nws mus.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply