Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Puas muaj zaum twg koj hnov khib thaum uas lwm tus ua tau yam ub yam no? Puas muaj zaum twg koj pom tias tsis ncaj ncees rau koj thaum koj rau siab ntso ua haujlwm tiamsis tsis muaj ib zaum twg tau nce qib siab lossis saib taus? Vajtswv txojlus hnub no ntuas kom peb paub tias txhua txoj koob hmoov puav leej los ntawm Vajtswv los, tag nrho tej uas koj muaj, koj ua, koj ua pab, koj txais tau puav leej yog los ntawm Vajtswv txoj koob hmoov thiab los ntawm Vajtswv los.
Hnub no, yog hnub 31/01/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Mari Schleicher dhau ntawm Zaj kawm TXHUA TXOJ KOOB HMOOV PUAV LEEJ LOS NTAWM VAJTSWV LOS
“Ib puas tsav yam uas zoo thiab ib puas tsav yam koob hmoov uas zoo kawg nkaus yeej yog Vajtswv pub rau peb. Vajtswv yog tus uas tsim lub hnub, lub hli thiab tej hnubqub uas nyob saum nruab ntug. Lub hnub thiab lub hli yeej ua rau lub ntiajteb txawj kaj thiab txawj tsaus, tiamsis Vajtswv tsis zoo li ntawd, Vajtswv yeej zoo Vajtswv li qub” (Yakaunpaus 1:17)
Muaj ntau zaug peb yuav hnov tias tsis ncaj ncees nyob rau hauv lub neej no. Koj pom tias koj siv zog ua tej haujlwm yog, tshuav lwm tus lawv mus los ntawm lwm txoj kev tsis ncaj ncees, tsis tas ua qee yam, lossis tsis nquag zoo li koj. Ntawm kuj yog txoj kev xav ntawm tus neeg ua vaj nyob hauv Mathais 20:1-16.
Tswv Yexus hais txog ib tug tswv nws muaj ib lub vaj thaum sawv ntxov nws mus nrhiav neeg ntiav tuaj ua nws lub vaj. Nws nrog cov neeg ua vaj sib tham yuav them rau cov neeg ua zog ib hnub ib lub nyiaj. Tom qab lawv mloog txoj kev sib tham no, lawv kam thiab mus ua haujlwm hauv yawg tsev. Tom qab ntawd, yawg rov qab mus rau tom khw peb zaug ntxiv ntiav neeg tuaj ua haujlwm nyob rau hauv yawg lub vaj.
Thaum tsaus ntuj, tus tswv vaj hu lawv los them nyiaj zog rau lawv. Thaum tus tswv them nqi rau lawv, cov neeg tuaj ua ua ntej xav tias lawv yuav txais tau nyiaj ntau dua cov tuaj ua ua qab tiamsis tag nrho sawv daws puav leej ib leeg tau ib lub nyiaj xwb. Yog li lawv thiaj tsis txaus siab rau tus tswv txog tej haujlwm ntawd.
Tej lus tsis txaus siab ntawd tau tus tswv teb li no:
“Tus tswv vaj teb rau lawv cov ntawd ib tug hais tias, ‘Phoojywg, tsis yog kuv ua tsis ncaj rau koj , koj twb yeej zoo siab ua ib hnub ib lub nyiaj lawm los sav. Koj cia li nqa koj lub nyiaj thiab mus tsev. Kuv zoo siab muab rau tus uas tuaj tom qab npaum li uas kuv muab rau koj. Kuv tsis muaj cai muab kuv tej nyiaj siv raws li kuv porn zoo los? Koj porn kuv muaj lub siab dawb, koj txawm khib los?” (Mathais 20:13-16).
Dhau los ntawm zaj lus piv txwv no, Tswv Yexus xav qhia yam dabtsi rau peb? txhua tes haujlwm peb ua puav leej ua rau Vajtswv, thiab txhua tes haujlwm peb ua tau puav leej yog Vajtswv pub koob hmoov txaus rau peb thiaj muaj txaus zog los ua. Dhau ntawm Vajtswv lawm peb yeej ua tsis tau ib yam dabtsi. Vajtswv yog tus pub koob hmoov thiab dag zog rau peb.
Xibhwb Charles Spurgeon hais tias: “Lub zog ua haujlwm pub rau Vajtswv yog qhov khoom plig uas Vajtswv pub”. Vajtswv yog tus pub lub peev xwm thiab koob hmoov rau peb kom peb ua haujlwm pub rau Vajtswv thiab txhua yam peb ua puav leej los nawm Vajtswv los.
Xibhwb Spurgeon sau ntxiv li no tias: “Peb qhov nqi zog tsis yog los ntawm qhov uas peb ua rau neeg ntiajteb pom tias peb zoo. Tej zaug peb yuav ua tau qee yam los ntawm hnub nyoog, tej neeg zej zog thiab tej neeg ib ncig peb. Tej zaug muaj qee tus tib neeg lub koob npe yuav nrov mus rau tiam tom qab tiamsis kuj muaj qee tus yeej tsis muaj koob npe dabtsi. Muaj qee tus tib neeg luag nco nws lub npe mus tas ib txhis. Muaj qee tus neeg lawv kuj tau sawv daws nyob txhua qhov paub txog. Kuj muaj lwm tus lawv ua lub neej ib ncig ntawm tsev neeg thiab tsis muaj ib zaum twg lawv ua neej tawm ntawm tus nrim ntawd. Tiamsis Vajtswv yog tus saib txhua yam puav leej muaj nqis.
Muaj ib txhia pojniam lawv ua tes haujlwm pab tsev neeg lawv ua lub neej hwm Vajtswv, cob qhia lawv tej menyuam los ntawm Vajtswv tej lus nyob hauv lawv lub tsev me me. Tej pojniam ntawd lawv yeej puv npo koob hmoov, muaj koob npe, tsim nyog saib taus ntawm Vajtswv xub ntiag. Ib tug neeg ua haujlwm cob qhia Vajtswv txojlus, txhawb tsheej txhiab tus lub zog. Nws kuj yog ib tug muaj koob hmoov, muaj koob npe. Vajtswv yog tus ntsia pom txhua tes haujlwm peb ua, thiab Vajtswv yuav ntaus nqi muaj nqis rau sawv daws.
Thov caw nrog kuv peb thov Vajtswv ua ke
Ua Vajtswv tsaug vim txhua hnub dhau mus Vajtswv pub rau kuv muaj sijhawm zoo los ua Vajtswv haujlwm. Thov Vajtswv pab kom kuv paub saib ntsoov rau Vajtswv tej lus thiab tej yam uas peb ua haum Vajtswv siab, pauv qhov uas peb lub siab ua yij fab yij fwj los ntawm tus neeg no, tej haujlwm tod. Thov Vajtswv pab kom kuv kub siab lug tshaj tawm Txojmoo Zoo kom tej neeg ib ncig paub kuv thiab ntseeg Koj. Kuv thov hauv Tswv Yexus Khetos lub npe. Amees.
Cov kwv tij txhua tus, cia li ua Vajtswv tsaug vim txhua yam uas Vajtswv pub rau koj nyob hauv lub neej no puav leej yog los ntawm tej yam uas me tshaj plaws. Vajtswv yog tus yuav txiav txim thiab muab nqi zog kom tsimnyog raws li tej haujlwm uas txhua tus ua. Yog li yuav tau tseg koj lub sijhawm ua dejnum thiab nrhiav txoj kev zoo siab nyob hauv txhua ntu hauv lub neej uas Vajtswv pub rau koj. Txhawb tej neeg txheeb ze, tej phooj ywg kom lawv koom tes rau tes haujlwm ua Vajtswv haujlwm.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply