Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.
Txhawj thiab ntshai yog kev kaj siab tus yeebncuab. Txhua yam nyob hauv lub neej no yuav dhau mus tiamsis Vajtswv txojlus yeej tsis hloov. Txoj kev kaj siab uas Vajtswv muab pub rau peb nws loj tshaj tib neeg txoj kev xav. Yeej tsis muaj dabtsi nyuaj rau Vajtswv. Vajtswv yog tus yuav tso peb dim ntawm lub sijhawm tag kev cia siab thiab tsis muaj kev kaj siab nyob hauv lub neej no.
Hnub no, yog hnub 31/12/2023, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Hannah Goodwyn dhau ntawm Zaj kawm KEV KAJ SIAB LOS NTAWM VAJTSW LOS
“Yeej tsis muaj leejtwg yuav paub qhov uas Vajtswv ua rau nej muaj kev kaj siab thiab qhov uas nej nrog Yexus Khetos koom ib txojsia thiab tej uas nej xav huv tibsi” (Filipis 4:7)
Thaum ua neej nyob rau hauv lub ntiajteb uas muaj txhua yam ntxhov nyho, peb lub siab tsis muaj kev kaj siab. Peb xav kom muaj kev kaj siab rau tsev neeg, rau txhua txoj kev sib raug zoo uas pob puag thiab xav kom muaj kev sib raug zoo rau txhua haiv neeg nyob hauv lub ntiajteb no.
Tiamsis muaj ib yam uas Vajtswv yeej tseem tab tom ua haujlwm nyob rau hauv lub ntiajteb uas puv npo kev ntxhov nyho no.
Kev kaj siab uas kuv tab tom hais txog ntawm no tsis yog txoj kev kaj siab nyob hauv lub ntiajteb no tiamsis yog los ntawm Vajtswv los. Tseeb tiag, kev kaj siab uas ntiajteb muab pub rau peb yuav yooj yim dhau mus tshuav txoj kev kaj siab uas Vajtswv pub rau peb tseem yuav nyob mus ib txhis.
Peb yeej tsis muaj leej twg yuav zam dhau tej kev txhawj thiab ntshai. Peb yuav zam tsis dhau tej ntawd. Nyob ntawm kuv, kuv ntshai rog heev vim kuv tsis xav kom kuv rog. Dhau ntawd kuv tseem txhawj rau kuv tsev neeg lub neej tom ntej. Thiab kuv yeej tseem txhawj txog kuv txiv tus mob tuag tes tuag taw tom qab ob xyoo dhau los thaum no rov qab zoo zuj zus los. Kuv tseem txhawj rau kuv tus nus thaum uas nws ua tub ceev xwm. Tsis tas li ntawd kuv tseem txhawj txog qhov uas kuv yuav tsis muaj hnub ntsib kuv tus txiv nyob rau tom ntej.
Txawm yog ntau thiab tsawg los tag nrho peb txhua tus puav leej ntshai. Tiamsis Vajtswv yog tus muaj hwjchim Vajtswv ua tau txhua yam. Yeej tsis muaj ib yam dabtsi nyuaj rau Vajtswv. Vajtswv yog tus uas yuav tso peb dim ntawm lub caijnyoog uas tag kev cia siab thiab tsis muaj kev kaj siab ntau tshaj peb txoj kev xav. Tseeb tiag, Vajtswv yog tus uas ua txhua yam haujlwm zoo ntau tshaj peb txoj kev xav.
Ua Vajtswv tsaug vim Vajtswv siv Filipis 4:6-8 txhawb kuv thiab kuv cov phooj ywg:
“Nej tsis txhob nyuaj siab rau ib yam dabtsi hlo li, thaum nej thov Vajtswv nej cia li qhia txhua yam uas nej xav yuav rau Vajtswv, thiab thaum nej thov nej yuav tsum nco ntsoov ua Vajtswv tsaug. Yeej tsis muaj leejtwg yuav paub qhov uas Vajtswv ua rau nej muaj kev kaj siab thiab qhov uas nej nrog Yexus Khetos koom ib txojsia thiab tej uas nej xav huv tibsi. Cov kwvtij, kuv thov xaus lus li no hais tias nej yuav tsum cim ntsoov tej uas zoo thiab tsimnyog qhuas rau hauv nej lub siab: tsis hais tej uas tseeb, tej uas tsimnyog hwm, tej uas ncaj ncees, tej uas dawbhuv, tej uas ntxim nyiam thiab tej uas yuav tau koob meej, nej yuav tsum khaws tej ntawd cia rau hauv nej lub siab huv tibsi.”
Yog li, peb yuav tau muab peb tej kev txhawj fij rau Vajtswv vim Vajtswv yog tus pub kev kaj siab rau peb.
Tsis tas li ntawd thaum uas peb ntsib teeb meem ntxhov nyho ces koj yuav tau muab txhua txoj kev txhawj ntawd fij rau Vajtswv thiab so rau hauv txoj kev kaj siab uas Vajtswv pub. Vam khom rau Vajtswv tej koob hmoov ib yam li Vajtswv tau hais kom Mauxes foom hmoov rau cov neeg Yixalayees tau sau tseg nyob hauv Teev Npe 6:24-26:
“Thov tus Tswv foom hmoov rau nej thiab tsomkwm nej; Thov tus Tswv ua siab dawb siab zoo rau nej thiab hlub nej; Thov tus Tswv tsa qhovmuag saib nej thiab pub rau nej muaj kev kaj siab lug”
Thov caw nrog kuv peb thov Vajtswv ua ke
Ua Vajtswv tsaug vim Vajtswv pub kev kaj siab rau kuv tsis zoo li tej kev kaj siab ib vuag nyob hauv ntiajteb no. Vajtswv paub zoo yam twg yog yam uas zoo rau kuv nyob rau hauv txhua lub sijhawm thiab kuv lub neej tom ntej nyob hauv Vajtswv txhais tes. Thov Vajtswv koj nrog nraim kuv nyob, ntxiv zog rau kuv thiab pub kom kuv muaj ib lub xyoo tshiab puv npo kev kaj siab nyob hauv Leej Txiv txhais tes. Kuv thov hauv Tswv Yexus Khetos lub npe. Amees.
Cov kwv tij, cia li siv tej lus taij thov, ua tsaug muab tej kev cheem tsum fij rau Vajtswv. Vajtswv txoj kev kaj siab nws nyob siab tshaj peb txoj kev xav, yuav tiv thaiv nej lub siab thiab lub hlwb nyob hauv Yexus Khetos. Vam khom rau Yexus Khetos tej lus cog tseg nyob mus ib txhis thiab muaj lub siab tawv kov yeej tej kev txhawj ntshai nyob hauv koj lub siab.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.
Leave a Reply