Tơnggumê: CAU CHÀI LƠH CHI SƠNĐAN LA JÔ SEP

Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Kờp dơ̆ tòm kơnhai Yàng Lik Ling, bol he geh kơnọ oă yal yau bơh mò Mari deh Yàng Jesus tòm wang belàt. Bulah behơ̆, digơlan gơs dô ết nă cau tòm bol he lơi bơta wet tus krơi is cau chai lơh chi Jôsep in, cau geh hơ pơgon bau mơ Mari, là bèp đah poàc să Yàng Jesus dê. Wơng loh bơh Jôsép ai bol he in gŏ krơh bơh dô nơm nùs nhơm dơng ală cau geh Yàng sac dê.

Ngai do, ngai 16/12/2023, Bơta Hòi Dan Kơp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl mò Cathy Irvin bơh tơnggumê CAU CHÀI LƠH CHI SƠNĐAN LA JÔ SEP

“Kòñ gơboh tĕ duh hul bal mơ gơp be oh mi tòm Yàng, jơh nùs sền tĕ màng ryŭ bal mơ gơp.” (Rôma 12:10)

Añ kơlôi nền cê lah tòm tŭ git bau ur hơ pơgon he dê neh bun, ồng Jôsep gơlơh hut hơng mơ moat jrung. Sră goh yal wơl lah Jôsep kòñ lơi òm mơya tŭ hơ̆ cau gơnrơh Gabriel tơlik măt mơ ông mơ sôr ồng bañ rngòt bau mơ Mari. Să tòm cau gơnrơh Gabriel kung tơlik mat mơ Mari mơ đơs lah khai rơp bun Yàng Jesus bơh Yàng Hwềng Goh.

Ngăn la bơta lơngai dơng ngan ai Mari mơ ồng Jôsep in. Să tòm Yàng Tòm Trồ neh sac ồng Jôsep lơh cau bèp đah poac să Yàng Jêsus dê. Mơya ông kung dơrcul tòm tŭ kơnọ mò neh bun.

Tơnơ̆ mơ neh kơnọ cau gơnrơh đơs, ồng lơh nền pồn ală broă mơ cèng mò Mari lơh gơs bau ur khai. Ồng ò di ming dòn bơr Yàng Tòm Trồ mơ kung kòñ gơboh mò Mari jơh nùs. Ông tòmbau mơ mò Mari nàng sền gar mò mơ kòn dềt Jêsus. Tơnơ̆, cau gơnrơh yal tai tòm mpau nàng ông Jôsep cèng kòn dềt Jêsus tus hơ Ejiptơ nang dô pồn tai bơh bơtau Hêrôt ai gơnoăr sôr tơnchơt jơh ală kòn dềt klau bơh dê bar sơnăm tus hơđơm.
Añ gơboh gơbài ồng Jôsep bơh ồng sùm kòñ gơboh mơ sền gar hiu nhă ồng dê. Ồng ò rngòt lòt bal mơ mò Mari tòm gùng lòt ngai lòt găn dê blang bràs mơ trồ tơngai noat mrềt nàng tus hơ Bêtlêhem. Ông teh mpồng kơp hiu ơpah bic nàng joi hiu bic mò Mari in mơ kòn dềt Jêsus mor lik rai. Mơya tai bơh hiu ơpah bic ò găm tiah tai gen tàng bol khai pal ơm ìng tòm wang belàt hiu ơpah dê mơ kòn dềt Jêsus lik ling geh klơm mơ ôi bic tòm bong ñhơt.

Tŭ bơtê bơh krơh ồng Jôsep dê, bol he gơs wet tus hơ kwơ mang cau ndai rlau mơ kwơ mang bol he dê ndrơm be ồng Jôsep hala ò? Wet tus hơ hiu nhă, gơp bơyô, mơ tian gơs la cau nàc crih la bơta dơng mang mơ Cau Dòn Krist pal lơh. Rlau tai, Jơnau Yàng tòm Sră Goh bơtọ bol he pal kòñ gơboh cau gơp bon he be he. Behơ̆ gen, kơnhai Yàng Lik Ling la tŭ lơmpah bol he ràng tơlik bơta kòñ gơboh găn dê ală phan pà mơ kung gan dê bơta lơh lòt niam, kòñ gơboh cau ndai, bơta chôl bơtrôt mơ lơi tŭ jơ krơi is nàng lơh bơta lơi ai lơh krơi cau lơi in hơ̆ mơ oh mi òhềt lơh cau hơ̆ in.
Bol he lơ ală bơta hơ̆ ò di nàng cau ndai jong rơ he mơya nàng ràng tơlik bơta kòñ gơboh Bơtau Krist dê ală ca ndai in. Añ git nền cê lah Yàng rơp ai lơngai wơl ồng mò oh mi in.

Ngăn behơ̆, Jơnau Yàng tòm sră Luka 6:38 cih lah: “Pà gòi tĕ, gen bol mê rơp geh cau pà wơl; bol khai rơp ai rnoas dờng, jeh, jơlềt rơnggô, bềng lìu, mơ tuh tòm ào jrùh bol mê dê. Bơh bol mê was cau in mơ rnoas lơi, gen cau kung rơp was wơl bol mê in mơ rnoas hơ̆ sơl.”
Gen tang, bol he rgơi đom krơh ồng Jôsep tòm kơnhai YYàng Lik Ling tòm năm dô. Ồng dòn duh wil tơl nùs kòñ Yàng Tòm Trồ dê hơđăng rài kis he la lơh bèp đah poac să Yàng Jêsus dê. Yàng Tòm Trồ sac mò Mari bal mơ ồng Jôsep. Bơh kòñ gơboh mò Mari gen ồng niam nùs ai mò lơh gơs bau ur.

Ò di ồng ming dòn bơr Yàng Tòm Trồ mơ ồng kung lơh jat nùs kòñ Kơnràñ dê bơh ông kòñ gơboh Kơnràñ. Tòm tŭ dô nă lơi ơn nùs nhơm he dê Yàng in gen Yàng rơp dong bol khai lòt găn dê ală bơta mơ gơlong bol glar bol khai gam tip. Bulah tŭ hơ̆ ồng ò wơng ñchi bơh tai Yàng Tòm Trồ kòñ ông lơh behơ̆ mơya ồng gam dòn kơnòm Kơnràñ la Bơtau dong ông lòt găn. Ồng ò dô pồn mơ ông kung ò gơmlah bơr Yàng dê. Ồng lòt jat gùng rơndap Yàng Tòm Trồ dê.

Ồng Jôsep la dô nă cau chai lơh chi bă lìa, os lơm mơya jơh nùs kòñ gơboh Yàng Tòm Trồ mơ kòñ ràng tơlik nùs kòñ gơboh hơ cau ndai mơ broă lơh. Bol he rơp gơlik gơs song ring, lơh gơklŏ sơnđan Yàng be ồng Jôsep mơ kòñ gơboh dê ală cau mơ bol he tip hala ò? Lơngai ngan ò git nđờ tŭ bol he geh lơh kòn klau mơ kòn ur Yàng Tòm Trồ dê.

Kơp kòñ lah bol he rơp lơh jat jơnau Yàng geh cih tòm sră Rôma 12:10 “Kòñ gơboh tĕ duh hul bal mơ gơp be oh mi tòm Yàng, jơh nùs sền tĕ màng ryŭ bal mơ gơp.”

Dan jà bol he dô nùs bal tòm bơta hòi dan:
Ưnngai Yàng bơh ală nùs nhơm niam ồng Jôsep dê tơngkah wơl kòn in oă bơta. Dan Yàng dong kòn sùm wet tus, kòñ gơboh cau ndai mơ ràng tơlik bơta kòñ gơboh hơ̆ mơ broă lơh tòm kơnhai Yàng Lik Ling năm dô. Dan Yàng dong kòn ngui bơta kòñ gơboh Kơnràñ dê nàng rgơi toh glài mơ kòñ gơboh bal mơ ală cau neh lơh jê sồt kòn. Kòn ai sơnđăn Yàng Jêsus Krist hòi dan mơ Yàng Bèp, Amen.

Ơ ală ồng mò oh mi kòñ gơboh,, bulah ntao diđap ală bơta gơlik gơs mơ ồng mò oh mi ò wơng git ñchi bơh tai gen kư sùm dòn kơnòm Yàng la Bơtau dong kơl ồng mò oh mi lòt găn. Bañ dô pồn, bañ rùc wơl mơya pal gơn kơnòm nđàc Yàng nàng lòt jat gùng rơndap Kơnràñ dê. Lơi tĕ bơta kòñ gơboh bơkoat mơ lơh gơsor wơl ală bơta gơ tòmklĕ tòm rài kis ồng mò oh mi dê. Yàng chò nùs tòm tŭ sền gŏ ồng mò oh mi git kòñ gơboh mơ sơlơ ngai sơlơ ndrơm be Bèp Hơđang Jong.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.