Tơnggume: DƠ WÀI KƠNHAI NOEL DÊ

Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Gơs tŭ lơi bol he lùp is ñchi bơtài Yàng Jesu la Kòn Dùl Yàng Tòm Trồ dê lik lìng gơlik gơs la kòn mơnus sơl? Yàng Jesu tus tòm dunnia nàng dong kòl bol he đal git Yàng Tòm Trồ. Dilah ò kơnòm dê bơta phi sa Yàng Jesu dê mơ bơta nđàc dong klàs Yàng dê gen bol he ò rgơi gơ tòm sò wơl mơ bơta tòm klac bal mơ Yàng Tòm Trồ. Hơ̆ la bơta ñchi bơ tài bol he kah kirsơnre Yàng Jesu lik lìng bơh nam do tus nam ne.

Ngai do, ngai 18/12/2023, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl ồng Pat Robertson bơh tơnggume: DƠ WÀI KƠNHAI NOEL DÊ

‘ Tài bơh hơ̆ mơ Añ neh lik lìng mơ kung tài bơh hơ̆ mơ Añ neh lòt tus tòm dunnia nàng lơh cơng bơh jơnau song. Kòp nă cau lơi bal mơ jơnau song gen iat jơnau đơs Añ jê.” ‘ (Jang 18:37)

Niam ngan tŭ Yàng đơs bơh ñchi bơ tài Yàng lik ling lài mơ tŭ Yàng kong chơt. Tòm hiu cahrña Yàng Jesu gen ồng Pilat lùp Yàng Jesu la mê la Bơtau ơ? Yàng Jesu ho lah: “Be jơnau ồng đơs, Añ la Bơtau. Tài bơh hơ̆ mơ Añ neh lik lìng mơ kung tài bơh hơ̆ mơ Añ neh lòt tus tòm dunnia nàng lơh cơng bơh jơnau song. Kòp nă cau lơi bal mơ jơnau song gen iat jơnau đơs Añ jê. (Jang 18:37b)

Yàng Jesu đơs lah Kơnràñ lik lìng mơ mủ tòm dunnia nàng lơh cơng bơh jơnau song.

Mơya ồng Pilat lùp tai lah: “Jơnau song la ñchi taih?” Ồng lùp Yàng Jesu be hơ̆ tài bơh ồng kòñ git tơn sèng ho. Gơs oă cau tòm bol he ngai do kung kơp kòñ Yàng ho tơn ală sèng lùp bol he dê sơl? Gơs tŭ bol khai pal tơm gen bơta kis să tòm dê, hala hiu nha hala kong gơ tòm sò dră lài mơ tŭ kòp cau rgơi đal git bol khai kis dô rài kis gơs gơtha ngan ală cau ndai in.

Tŭ geh tìp mơ bơta gơlik gơs be hơ̆ gen añ kơ lôi tus bàr sèng Sră Goh hơđang kung gơ lơh dròm bal.

Jơnau Yang Jesu ho tòm Jang 8:32 mơ 14:6a kư̆ gam ntàs gan dê ală rài lah:

‘Bol mê rơp git jơnau song, mơ jơnau song rơp hồ toh bol mê.” …..“Añ la gùng lòt, jơnau song, mơ bơta kis.’

Yàng Jesu tus tòm dunnia do nàng cèng tus dô jơnau yal tơnggit kwơ màng ngan lah Yàng Tòm Trồ la Bơtau Crơng Gơs, la Bơtau sền gar mơ dong klàs. Jơnau Yàng tòm Sră Goh ai bol he in git lah: “ò bơh Añ gen ò gơs cau lơi geh lòt tus hơ Bèp.” (Jang 14:6b)

Yàng Jesu tus tòm dunnia nàng dong bol he in đal git Yàng Tòm Trồ. Hơ̆ la ñchi bơ tài bol he kah kirsơnre Yàng Jesu lik lìng bơh nam do tus nam ne. Yàng Jesu geh hòi la Emmanuel, gơs gơtha la Yàng Tòm Trồ ơm bal mơ bol he. Ngan be hơ̆ Yàng Tòm Trồ ơm bal mơ bol he bơh tŭ bol he gam mòm sa tus dê tŭ bol he rơp kra sơnam jòng. Yàng kung ơm bal mơ bol he tòm tŭ bơtoah kung be tòm tŭ kalke, tòm tŭ bòl glar kung be tòm tŭ geh phalin.

Tŭ bol he neh dòp rò bơta yal tơnggit Yàng Jesu dê gen kung pal tòm pà Jơnau Yàng Tòm Trồ cau ndai in.
Ngan be hơ̆ să tòm Yàng Jesu neh jào gơ noar broă bol he in tòm sră Broă 1:8: “Mơya tòm tŭ Yàng Hwềng Goh mù hơđang bol mê, gen bol mê rơp dòp geh gơnap gơnoar, mơ rơp lơh gơs cau lơh cơng bơh Añ tòm ƀòn dờng Jerusalem, jơh lơgar Jude, lơgar Samari, jơl tus làm plai ù.” ‘

Dan jà bol he dô nùs bal tòm bơta hòi dan:
Khoai Bèp kòñ gơboh, ưn ngài Yàng kòp tŭ tus ngai kah kirsơnre Yàng Jesu lik lìng bol kòn geh tơngkah wơl bơh bơta kòñ gơboh dờng ơnàng Yàng dê. Dan Yàng dong bol kòn lơh cơng bơh bơta kòñ gơboh Yàng dê ai kòp nă cau gùt dar war wĕ bol he dê nàng bol khai kung git ñchi bơtài Yàng Jesu tus tòm dunnia do. Dan Yàng dong bol kòn đal git Yàng Tòm Trồ rlau tai tòm rài kis do. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, ngai kơnhai kah kirsơnre Yàng lik lìng kòp nam la tŭ lơmpah nàng bol he sền wơl gùng lòt jat Yàng mơ kòp ală bơta lơngap lơngai Yàng ai pà. Yàng kòñ bol he tòm pà mơ bơto yal Jơnau Niam mơ bơta kòñ gơboh dong klàs Yàng dê tus dê tơl nă cau. Tòm pà tĕ ală jơnau yal tơnggit kòñ gơboh mơ hòi jà ală cau lòt tus ală bơta rơndap tap sèng kah kirsơnre Yàng lik lìng tòm hiu jum ồng mò oh mi dê. Jơh Lơgar hơđang trồ rơp chò hòp tŭ geh dòp rò ală hwềng soan wơlke dòp git Yàng Jesu.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.


Posted

in

by

Tags:

Comments

Leave a Reply

Your email address will not be published. Required fields are marked *