Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.
Gơs tŭ lơi ồng mò oh mi gơlơh rngòt rngơt tŭ ơm jŏ tòm bơta klăm jơngo cik sơl? Bơta àng cèng tus bol he in bơta lơngap lơngai, bơta gơn kơnòm mơ sol pơnđàng gùng lòt bol he in. Sră Goh ai he in git lah cau dòn Yàng la cau ò gam ơm tòm bơta klăm jơngo tai mơya gơs bơta àng bơta kis tài bơh Yàng Jesu la bơta àng dunnia. Gùng lòt cơn đòa jat Yàng la gùng lòt sol àng digùl rài kis.
Ngai do, ngai 29/01/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl ồng Pat Young bơh tơnggume KIS TÒM BƠTA ÀNG
‘Bơh lài òr oh mi la klam jơngo, mơya tŭ do oh mi la àng tòm Yàng; lơh lòt tĕ be cau ơm tòm bơta àng, ‘ (Ephesô 5:8)
Ngan gơ dê la tòm jơh bol he neh lòt gan bơta roh điện kung dul dơ̆ tòm rài kis he bulah tòm hiu is, hala tòm tiah lơh, tòm klờng bơtê hala tòm hiu jum. Să tòm añ kung lòt gan bơta roh điện oă dơ tòm rài kis tài bơh bơta nisơna gơtơntus be miu càl rbut dờng hala chập điện tòm hiu cau gơp ƀòn he. Gen be hơ̆, gơs ală tŭ mang jơngo mơ đèng ò rgơi sol pơn đàng.
Tŭ roh điện bol he rơp ơm tòm bơta klam jơ ngo. Tài bơh roh điện gen bol he ò rgơi đal gŏ broă dô bă loh làng. Mơya, dilah ò os mòng mơ ală broă gùt dar gen bol he ò rgơi bàn gŏ gùng lòt ò. Kis tòm bơta klam jơ ngo ngan gơ dê la iơh ngan.
Gơ plơ̆ wơl, dilah điện gơlik be os, ală bóng đèng tòm hiu bol he rơp geh pò àng kòp tŭ mang tus. Tŭ hơ̆, bol he rơp gŏ ală phan. Mơya, gơs tŭ gơs broă mơ bol he ò kòñ bàn. Ală phan ngùi tòm hiu bềng kơm buh ù pal càng jùt goh, hiu pal pơs wàs mơ jùt mơ gam oă broă ndai he pal càng lơh. Mơya, niam ngan tŭ bol he ơm tòm tiah gơs bơta àng.
Gơ wèt mơ rài kis đah hwềng bol he dê, lai mơ tŭ bol he dòp rò Bơtau Krist mơ jào phi rài kis he dê Kơnràñ in gen bol he kis tòm bơta klam jơ ngo. Bol he gŏ la geh bơta àng kơnòm dê ală cau dòn Yàng mơ sol pơn đàng bơta àng Bơtau Krist dê gan dê să tòm rài kis bol khai dê. Kung kơnòm dê jơnau lơh cơng bơh broă lơh bol khai be lơi nàng bol khai lik klàs bơh bơta klam jơ ngo tồi glài dê nàng ơm tòm bơta àng ring niam Kơnràñ dê tai.
Sèng Sră Goh tòm Jang 8:12 cih lah:
‘ Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.” ‘
Sră Goh ai bol he in git lah Yàng Jesu neh tơm jơh nàng twoài glài bol he mìng dul dơ̆ la tơl. Kơnràñ kong chơt mơ tơp, tus ngai dơ̆ pe Kơnràñ kis wơl. Tŭ dòp git Yàng mơ dòn duh Yàng, bol he pal kis tòm bơta àng mơ kung gơlik la bơta àng. Bulah bol he geh tìp mơ bơta lơi tai gen kung ò càng kơ lôi rcang ir tài bơh Yàng Jesu neh tơm dul dơ̆ la tơl bol he in rau. Bơta àng hơ̆ rơp ò tŭ lơi chơt.
Dilah ò gơs bơta àng bol he rơp jòi ò gơs gùng lik tòm bơta klam jơ ngo cik. Tài bơh bol he pal càng bơta àng Yàng Jesu dê sol pơn đàng hơ đang rài kis he dê.
‘Bơh lài òr oh mi la klam jơngo, mơya tŭ do oh mi la àng tòm Yàng; lơh lòt tĕ be cau ơm tòm bơta àng, ‘
(Ephesô 5:8)
Dan jà bol he dô nùs bal tòm bơta hòi dan:
Ưn ngài Yàng tài bơh Yàng Jesu tus tòm dunnia do nàng kong chơt ala kòn in mơ ai kòn in geh kis tòm bơta àng bơta kis dê mơ ò cơnđòa lòt tòm bơta klam jơ ngo tồi glài dê tai. Yàng dong kòn sol pơn đàng bơta àng Yàng dê tus ală cau ò hềt git tus Yàng nàng bol khai gơs tŭ lơm pah kơno iat bơh Yàng mơ dòn dòp Yàng. Kòn ai sơnđan Yàng Jesu Krist, hòi dan mơ Yàng Bèp. Amen.
Ơ ală ồng mò oh mi kòñ gơboh, bulah jơ do ồng mò oh mi geh tìp mơ ală bơta lơi gen kư̆ pơn jat ơm tòm bơta àng Yàng dê mơ sol pơn đàng bơta àng Yàng dê ală cau gùt dar war wĕ in. Bulah geh tìp mơ bơta kòp jê mơ ơm bic tòm cơ nòng kòp gen kung kư̆ jong rơ Yàng mơ lơh cơng bơh ală bơta nđàc lơ ngai lơ ngo dờng ơ nàng mơ Yàng lơh hơ đang rài kis ồng mò oh mi dê. Ngùi tĕ rài kis nàng duh broă Yàng mơ sol pơn đàng bơta àng tòm kòp bă tiah ồng mò oh mi lòt tus.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply