Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.
“LÒT MƠ YÀNG” – kơnọ gơlơh be gơdan mơ niam, ngăn sơl? Tian gơs kung gơs dô ết jrô ndơp! Dilah oh mi la cau kòñ joi git, digơlan ồng mò oh mi rơp ò rgơi kơryan wơl bơta kòñ git tòm tŭ kơnọ bơta do. Behơ̆ gen, dô nùs bal tĕ joi wơng bơh bơta lòt bal krơi is do.
Ngai do, ngai 13/01/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl Aaron Little dê bơh tơnggume LÒT MƠ YÀNG BƠH TIAH BLÀNG BRAS
“Yàng Jehôwa đơs: “Bơh Añ git bơta kơlôi sơnơng Añ jê gơwèt mơ bol mê, la bơta kơlôi sơnơng lơngap lơngai, ò di la rung rài, nàng bol mê in geh bơta gơn kơnòm tòm ngai tơnơ̆ bol mê dê.” (Jeremi 29:11)
“LÒT MƠ YÀNG” rgơi la don jat bơta tì lăm Yàng dê nàng dơp lêng dô gơnoăr sôr pa. Digơlăn oh mi geh Yàng hòi sac mut tòm broă pa, hala lik lòt kis tus dô kơnhwal pa. Digơlăn Yàng ai oh mi in dô tŭ lơmpah dong kơl ơdŭ bơtê Sră Goh, hala rong siam ală cau pal cang dong kơl. Kung digơlăn Yàng chôl bơtrồt oh mi sơmbơi ală tềl sồt tòm bơta gơtơmklĕ mơ hiu nhă mơ gơp bơyô.
Bulah, ò di tŭ lơi kung lòt bal mơ Yàng kung cèng wơl bơta chò hòp mơ bơta gơchôl bol he in. Gơs tŭ Yàng cèng bol he tòm ală bơta lơh lòt bol he ò kơp kòñ mơ ai lơh krơi ir. Gùng lòt hơ̆ rgơi sơntơm tơn bơh tiah roh rui, ò song ring, kop ji hala ji sồt tòm bơta kòñ gơboh. Hơ̆ la tiah blang bràs mơ Yàng ngui nàng tiar mòn, tiar bơtọ nùs nhơm bol he dê, dilah bol he di nùs lòt jat Kơnràñ. Gùng lòt do bulah kalkê ngăn mơya công nha dơp geh gen kas mang ngăn.
Pa do, ur klau cau bơyô dềt mêr añ jê neh git lam bơta do. Bơta kop ji kơñjơ̆ lơh bol khai in pal ntao diđap măt mơ oă bơta koh reh, lơh sơnơm, hiu sơnơm. Rlau mơ hơ̆ tai, kung găm la bơta jê sồt, bơta siơ̆u roh, tơmlơh nàng geh kis, kis tòm bơta rngòt rngơt mơ roh ring lơngai.
Cau lơi rơp rcăng sir mùt tòm gùng lòt behơ̆? Mơya añ dan lơh cơng bơh ală bơta crih crài mơ tiah “blang bràs hơ̆ neh cèng tus rai kis bol khai in. Hơ̆ la bơta git lam loh lang lah Yàng sùm ơm bal tòm ală bơta gơlik gơs, la bơta dòn hơ bơta niam mơ dòn song Kơnràñ dê (oh mi mìng git lam wil tơl ngăn bơta do tòm tŭ oh mi geh tiar mòn tòm ồs gơlong bol glar); Hơ̆ la bơta kòñ gơboh mơ nùs git duh rngòt jrô ndơp lin rlau lơi ai cau bơyô he in; mơ lồi dut kung la bơta lờngap lơngai – bơta lơngap lơngai ngăn ơm tơn digùl cal rbùt.
Bol khai geh dong klàs bơta git lam jê sồt, mơ geh Yàng yờ tơngguh rlau bơta jê sồt mơ sơmbat tê bol khai lòt găn bơta gơlong bol glar. Êsai 40:13 ràng tơlik jơnau hơ Yàng ai ală cau gam tìp bơta bol glar:
“Gơs jơnau cau hòi driau lah: ‘Rcang tĕ gùng tòm ƀlàng ngềt ngơt Yàng Jehôwa in; bơsong tĕ gùng me tòm ƀlàng bràs Yàng Tom Trồ bol he in!”’
Sră Goh yal wơl oă yal yau bơh ală krơh cau dòn, mor jơh cau lơi kung git lam tiah blang bràs mơ Yàng ngui nàng tiar mòn bol khai sơlơ ngai sơlơ kwơ rlau tai Kơnràñ in. Añ ai lơh gơboh bơh yal yau bơh ông Jôsep. Ông kol ală bi khai dê brô lơh cai dì, kol mò cau tòm yă tis, kol jam oàn jàn, mơ kol ală cau he dong kơl hŭi. Tòm 13 sơnăm kong ơt, Jôsep òhềt duh dô jơnau yoam hala joh Yàng. Oh mi rgơi sền wơl yal yau crih crai do tòm sră Sơnrờp bơh dap 37 tus 47. Tơnơ̆ mơ oă sơnăm kơnhai kol bol glar tòm blàng bràs, Jôsep neh bơtê geh nùs pơndềt să, dòn bơr, kơ̆dơn mơ nùs nhơm git broă lơh. Tòm pah rài wil tơl Yàng dê, ồng geh pồ bơtao lơh gơs cau at bồ jơh lơgar Êjiptơ, dong klas jơh làng bol Êjiptơ mơ hiu nhă ông bơh bơta jigloh rung tòm lơgar.
Oh mi pal cang lơh bơta lơi nàng tơmgơl tiah blàng bràs he dê gơlik gơs bơta lơh lòt mơ Yàng? Lai ngăn pal cih kah sèng Sră Goh dô tòm bồ dơngoh oh mi – Rôma 8:28:
“Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền Kơnràñ dê.”
JƠH ală bơta – ală bơta gơlong mơ kơlôi sơnưng oh mi dê tơn.
Gen tàng, ơ oh mi, pal dòn kơnòm tĕ tòm Yàng bulah oh mi gam gơkol tòm blàng bràs rò rañ. Dòn kơ̆ tĕ lah Kơnràñ neh rcăng sir oh mi in dô bơta lơh lòt lơngai crih crai mơ rơp tì lăm oh mi bơh tiah blàng bràs tus tiah hơ ai gơklŏ.
Dan jà bol he dô nùs bal tòm bơta hòi dan:
Ưnngai Yàng bơh Kơnràñ sùm ơm bal mơ kòn tòm tŭ buôn soh kung be gơlong bol glar. Să tòm tòm tiah blàng bràs rai kis he dê, kòn git lam geh bơta dòn song Yàng dê loh lang rlau jơh. Dan Yàng dong kòn sùm kơ̆ nùs kơp gơn dê bơta rơndap mơ tơnggu crih crai mơ Kơnràñ ai kòn in. Kòn ai sơnđăn Yàng Jêsus Krist hòi dan mơ Yàng Bèp, Amen.
Ơm ngac ală ồng mò oh mi yơ.
Ơn tĕ jơh ală bơta Yàng in mơ kơp gơn Kơnràñ. Oh mi găm geh tiar mòn – geh rcang sir gơnoăr broă Kơnràñ in jao. Păl bơtê tĕ bơh ală bơta gơlong.
Jao phi tĕ ală “gơnoăr”, ală jơnau song mơ pin wil wơl oh mi dê Kơnràñ in. Yàng ò tŭ lơi lơh tis.
Ơm rlô tĕ tòm Kơnràñ – sơnđing tĕ tòm Kơnràñ nàng Kơnràñ bơntơl pràn oh mi mơ bơta pràn kơldang Kơnràñ dê.
Dòn kơnòm tĕ dê tŭ lơmpah Kơnràñ dê – Kơnràñ neh lơh jơh ală bơta. Sră Goh Jêrêmi 29:11 đơs nền lah:
“Yàng Jehôwa đơs: “Bơh Añ git bơta kơlôi sơnơng Añ jê gơwèt mơ bol mê, la bơta kơlôi sơnơng lơngap lơngai, ò di la rung rài, nàng bol mê in geh bơta gơn kơnòm tòm ngai tơnơ̆ bol mê dê.”
Kư ơm rềp tĕ Kơnràñ, mơ tiah blàng bràs oh mi dê rơp gơlik gơs bơta lơh lòt mơ Yàng!
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.
Leave a Reply