Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.
Tŭ jơ, tŭ lơmpah mơ jơnau đơs la ală bơta mơ neh lòt găn hala neh đơs gen ò rgơi ai wơl til. Jơnau đơs cèng tus bơta gơtơmgơl mơya kung rgơi cèng tus bơta lơh sơbơng roh. Tom tŭ bơklơn bơta ò niam nùs nhơm mơ lơh bềng bồ dơngoh mơ ală bơta niam bung bơr bol he rơp sùm đơs ală jơnau chôl bơtrôt cau ndai.
Ngai do, Bơta Hòi Dan Kơp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl ồng Kimberly Poteet dê bơh tơnggumê ĐƠS TĔ JƠNAU LƠBƠN NIAM
“Bañ gơs jơnau iơh lơi lik bơh di bơr oh mi, mơya tòm tŭ pal đơs gen đơs tĕ jơnau niam nàng gơs bơt bơtào, tồ cèng bơta niam ală cau kơno in.”
(Êphêsô 4:29)
Dô mhô ngai nê, tòm gùng hao rơndeh ri hiu gen nùs añ jê sồt tòm tŭ kơnọ jơnau sơ êt sơ ìl kon klau dê. Bơh ò lơh jat nùs kòn dê gen kòn añ đơs ơm bơh ngkơi lah: “Kơp kòñ mê ò deh kòn.” Mơya ală jơnau kòn dê gơlơh be dô nơm phăn lơh jê sồt tòm plai nùs dô nă cau mê be añ.
Tŭ hơ̆ añ pơnđơl kơryăn ală dà măt mor gơhor mơ prăp bơta jê dồt mơat tòm jrô ndơp dơlăm nùs. Tòm tŭ lơmpah hơ̆, bồ dơngoh añ bềng ală jơnau đơs gơjrañ gơuing, đơs lah mơ lah pơrhơng. Mơya ưnngai Yàng tai bơh tŭ hơ̆ Kơnràñ dong añ bơklơn bơta gơhao gơjrañ añ dê. Añ đơs is mơ să tòm lah tai bơh kòn añ gam dềt mơ òhềt wơng jơh ală jơnau neh đơs gen tang añ pal cang tŭ jơ nang tiar mòn mơ dong kòn wơng ală bơta mơ khai neh đơs lơh cau ndai in moat jrùng mbe lơi.
Tòm jơh gùng ri hiu tŭ lơmpah ơm mŏ jrơm gòm tòm rơndeh, bar nă mê kòn añ ò tơmbơh bơr dô jơnau lơi. Tơnơ̆ mơ tŭ neh ri hiu, kòn klau kòñ tơmbơhbơr mơ añ mơya añ găm prăp ơm mŏ. Añ mùt tòm hiu dơng sa, ai dô mơngàn dà gen tuh hơ bơdih ù.
Tơnơ̆ neh tuh jơh dà tòm ù, añ sôr kòn klau ai wơl dà ơn tòm mơngàn. Kòn klau añ ai lơh krơi bơh bơta lơh lòt mê dê, bulah behơ̆ khai kung lơh jat jơnau mê mơ ai tê pơnđơl nàng bơ̆ wơl dà tòm ù ơn tòm mơngàn. Mơya tơnơ̆ mơ tŭ neh jŏ jong kòn klau añ đơs mơ añ lah kòn ò rgơi bơ̆ dà neh tuh nang ơn wơl tòm mơngan.
Tŭ hơ̆ kòn klau añ lùp lah: “Ñchi bơh tai kòn ò rgơi ai wơl dà neh tuh tòm ù?”
Kòn klau añ hơ lah: “Ơi tai bơh dà hor lik jơh gen tang kòn ò rgơi ai wơl ò.” Tơnơ̆ neh kơnọ kòn klau hơ wơl gen añ ơm mŏ tòm dô ết phúk. Gen añ đơs mơ kòn klau lah jơnau đơs neh đơs bol he dê kung ndrơm be mơngàn dà neh tuh hơđăng ù. Behơ̆ gen bol he pal cang kơrhia mơ kơp jơnau đơs tai bơh neh đơs lik bơh dê bơr rau gen ò rgơi ai wơl tai ò.
Tơnơ̆, bol he pơnjat tơmbơhbơr tai dô ết. Añ kòñ ală jơnau añ neh bơtọ gơprăp jrô tòm bồ dơngoh kòn klau dê. Añ kung kòñ bơtọ kòn klau gùng nàng bơklơn jơnau đơs he dê tom tŭ gơhao gơjrañ. Pal cang kơrhia mơ ală jơnau đơs tai bơh bol he ò rgơi ai wơl têl. Jơnau đơs gơs gơnoăr pràn grơng dơ, chôl bơtrôt mơ kung să tòm jơnau đơs rgơi lơh gơtơm cah is, ò ring bal tian gơs lăm tus ală công nha ò kơp kòñ.
Ưnngai Yàng ngan bơh Kơnràñ bơtọ bol he in bơta bơtê bơh bơta dơng mang jơnau đơs dê. Tơnơ̆ mơ bơta tơmbơhbơr hơ̆, mê kòn bol he lơh gơtơmsor wơl. Kòn klau añ dăn să mơ añ toh glài khai in.
Jơnau Yàng tòm Êphêsô 4:29 tơng kah bol he pal sùm đơs jơnau lơbơn niam tus hơ ală cau: “Bañ gơs jơnau iơh lơi lik bơh di bơr oh mi, mơya tòm tŭ pal đơs gen đơs tĕ jơnau niam nàng gơs bơt bơtào, tồ cèng bơta niam ală cau kơno in.”
Dan jà bol he dô nùs bal tòm bơta hòi dan:
Khoai Bèp kòñ gơboh, dan toh glài kòn in bơh oă dơ̆ kòn ò kơrhia tòm jơnau đơs he dê mơ lơh cau ndai in jê sôt. Dan Yàng dong kòn sùm kơrhia diđap ală bơta cang đơs nang ceng tus bơta bơt bơtao mơ chôl bơtrôt oh mi dô bơta dòn bal mơ ală cau kis gut dar kòn. Kòn ai sơnđăn Yàng Jesus Krist hòi dan mơ Yàng Bèp, Amen.
Ơ ală ồng mò oh mi kòñ gơboh, pal kơrhia tòm kơp jơnau đơs mơ sền sơwì ní non lai mơ tŭ đơs. Nang sùm đơs jơnau đơs niam gen bồ dơngoh bol he pal sùm kơlôi tus ală jơnau kòñ gơboh, ală bơta chôl bơtrôt, bơt bơtao cau ndai. Bañ đơs ală bơta lơh jê sồt cau ndai krơi is là tòm tŭ tơmlah, tơm pơndang bal tòm bơta gơjrañ. Mơya kơp ngai pal sơntơm mơ jơnau jong rơ, ai lơngai tus hơ ală cau gut dar ồng mò oh mi.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!
Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.